Në kuadër të kontrolleve të shtuara gjatë sezonit veror dhe bazuar në analizën e rriskut, shërbimet e Policisë Kufitare të Drejtorisë Vendore për Kufirin dhe Migracionin (DVKM) Korçë goditën një rast të kontrabandës me karburant në Pikën e Kalimit Kufitar Qafë Thanë.
Gjatë kontrollit të detajuar në vijën e dytë, një kamion me drejtues shtetasin E. Q., 38 vjeç, banues në Elbasan, u ndalua për verifikim të mëtejshëm. Gjatë kontrollit fizik, në dy serbatorët e mjetit u konstatua një sasi e konsiderueshme karburanti që tentonte të futej në mënyrë të paligjshme në territorin shqiptar.
Në përfundim të veprimeve procedurale, shtetasi E. Q. u arrestua në flagrancë për veprën penale:
“Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”.
Sasia e naftës u sekuestrua në cilësinë e provës materiale.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
