Ka nisur zyrtarisht sot edicioni më i ri i Korça ICT Academy – Code for Albania, një nga programet më të rëndësishme dhe gjithëpërfshirëse të edukimit teknologjik për të rinjtë në Shqipëri.
Në këtë edicion marrin pjesë 100 nxënës të përzgjedhur nga e gjithë Shqipëria, të apasionuar pas teknologjisë, kodimit dhe inovacionit. Ata do të angazhohen në një kamp intensiv dyjavor që do të zhvillohet në qytetin e Korçës.
Programi ofron mbi 80 orë trajnime praktike, të udhëhequra nga instruktorë ndërkombëtarë nga Stanford University dhe nga qendra prestigjioze të teknologjisë dhe edukimit në SHBA dhe Kanada. Pjesëmarrësit do të kenë mundësinë të zhvillojnë aftësi konkrete në programim, krijimin e aplikacioneve dhe zgjidhjen e problemeve reale, duke ndjekur një metodologji të avancuar dhe qasje ndërdisiplinore.
Përveç trajnimeve, programi ofron edhe mentorim individual, duke krijuar ura lidhëse midis të rinjve dhe profesionistëve të suksesshëm në industrinë globale të teknologjisë.
Ky aktivitet synon të zbulojë dhe zhvillojë talentin vendas, të ofrojë mundësi për zhvillim profesional dhe të kontribuojë në formimin e brezit të ardhshëm të krijuesve dhe liderëve në fushën e teknologjisë dhe inovacionit në Shqipëri.
Korça ICT Academy – Code for Albania 2025 do të mbahet nga 14 deri më 27 korrik, duke e shndërruar qytetin e Korçës në një qendër të gjallë të dijes, teknologjisë dhe bashkëpunimit rinor.
