Trajneri i Dinamos, Ilir Daja, ka vlerësuar maksimalisht skuadrën e Skënderbeut përpara përballjes së javës së dytë të Abissnet Superiore, duke theksuar nevojën për menaxhim të energjive pas impenjimit europian të bluve. Ndeshja do të zhvillohet të hënën në mbrëmje në stadiumin “Elbasan Arena”, ku kryeqytetasit vijnë pas një sfide rraskapitëse prej 120 minutash në Conference League.
Menaxhimi i energjive dhe respekti për kundërshtarin
Gjatë konferencës për shtyp, tekniku Daja pranoi se lodhja fizike mund të jetë një faktor ndikues në këtë takim. “Rikthehemi në kampionat dhe e dimë që është e vështirë, pasi kemi luajtur 120 minuta para tre ditësh. Duhet të menaxhojmë sa më mirë energjitë për të qenë efikasë ndaj Skënderbeut”, u shpreh ai, duke kërkuar përqendrim të plotë nga lojtarët e tij.
Për trajnerin e Dinamos, rikthimi i klubit historik të Korçës në elitën e futbollit shqiptar është një lajm pozitiv për kampionatin. “Skënderbeu është një vlerë e shtuar për Superiore. Ata vijnë pas një barazimi që u ka dhënë një dozë të mirë psikologjike. Për këtë arsye, ndeshja duhet vlerësuar në maksimum”, deklaroi Ilir Daja, duke iu referuar pikës që korçarët morën në javën e parë ndaj Vllaznisë.
Gjendja e skuadrës dhe mungesat
Sa i përket përgatitjeve, Dinamo do të ketë disa mungesa të rëndësishme për sfidën e së hënës. Mbrojtësi Aliji nuk do të jetë i gatshëm për lojë, ndërsa dy lojtarë të tjerë janë prekur nga viruset e stinës, duke vështirësuar planet e stafit teknik. Megjithatë, pjesa tjetër e grupit mbetet në dispozicion për të kërkuar rezultatin pozitiv.
KF Skënderbeu, si klubi historik i futbollit të Korçës dhe disa herë kampion i Shqipërisë gjatë viteve 2010-2018, synon të vazhdojë ecurinë pozitive pas rikthimit në elitë, ndërsa kjo përballje mbetet një nga sfidat më interesante të javës.
