Rijetëzimi i godinave historike në qytetin e Korçës ka qenë më shumë sesa një proces restaurimi,ka qenë një akt dashurie ndaj identitetit dhe historisë sonë kolektive. Me një qasje të kujdesshme ndaj ruajtjes së trashëgimisë kulturore, Korça është kthyer në një destinacion të veçantë turistik, ku mijëra vizitorë çdo vit zbulojnë bukurinë e një qyteti që respekton të shkuarën dhe ndërton me vizion të ardhmen.
Në këtë kuadër, një nga projektet më të fundit që do të marre formë shpejt është ai i transformimit të sheshit të Metropolisë, në zemër të qytetit. Si një nga hapësirat më të njohura urbane, ky shesh do të marrë pamje të re falë një ndërhyrjeje të thelluar që parashikon rilindjen e fasadave përreth, krijimin e një hapësire publike moderne, shtim të elementeve të gjelbërimit, si dhe ambiente çlodhjeje e argëtimi të dedikuara veçanërisht për fëmijët.
Projekti nuk synon vetëm përmirësimin estetik të zonës, por është një pjesë thelbësore e një strategjie më të gjerë për evropianizimin e standardeve të jetesës në çdo lagje të qytetit dhe më gjerë.
“Ky nuk është thjesht një projekt i bukur, është një dëshmi e vendosmërisë sonë për të ndërtuar një Korçë që i përket së ardhmes, një qytet ku çdo cep pasqyron kujdesin dhe aspiratën për më mirë,” – shprehet Ilirian Pendavinji që është rritur në lagjen nr. 2.
Transformimi i sheshit të Mitropolisë është një tjetër hap drejt modernizimit të Korçës, duke ruajtur thelbin e saj historik ndërkohë që përqafon risinë dhe zhvillimin urban.
