Pallati i Kulturës “Dhimitër Orgocka” në Maliq ka çelur një ekspozitë të rrallë fotografike që dokumenton jetën dhe zhvillimet gjatë Luftës Italo-Greke, përmes objektivit të fotografit grek Christu N. Petru Mesogiti.
Imazhet e ekspozuara përfshijnë periudhën nga nëntori i vitit 1940 deri në mars të vitit 1941. Koleksioni nuk fokusohet vetëm tek zhvillimet e luftës, por sjell një dëshmi autentike të jetës së përditshme në fshatrat e zonës së Maliqit, Korçës dhe Pogradecit.
Historia pas aparatit fotografik të blerë në Korçë
Sipas Petros Filippou, fotografi Mesogiti u plagos gjatë luftimeve dhe më pas u caktua të shërbente në administratën e ushtrisë greke. Gjatë qëndrimit të tij në Korçë, ai bleu aparatin fotografik me të cilin arriti të dokumentojë jo vetëm skenat ushtarake, por edhe përditshmërinë në fshatrat shqiptare të rajonit juglindor.
Kjo ekspozitë synon të sjellë historinë më pranë publikut, duke prezantuar materiale të rralla me vlera të larta historike dhe kulturore. Të gjithë të interesuarit do të kenë mundësinë të vizitojnë këtë panoramë vizuale të së shkuarës deri të dielën, për të zbuluar dëshmi të veçanta mbi historinë e rajonit.
