Prokuroria e Korçës, ka marrë të pandehur ish-shefin e Sektorit të Shërbimeve të Kufirit në Korçë, duke e akuzuar atë për “Trafikim të lëndëve narkotike” kryer në bashkëpunim.
Stiljano Pasho, u arrestua në 27 nëntor 2023, pasi nga pika e kalimit kufitar Kapshticë së bashku me personin tjetër, Lorenc Likën, trafikuan nga Shqipëria në Greqi 26 kg drogë.
Ngjarja e rëndë tronditi Policinë e Shtetit, pasi kalimi përmes pikës doganore i makinës tip “Passat”, ku ishte fshehur droga, u realizua në mes të ditës dhe në prezencë të gjithë trupës policore që shërbente në ato momente.
Pamjet filmike të sekuestruara nga prokuroria e Korçës treguan se Stiljano Pasho, ka shoqëruar dhe më pas kaluar në pikën e kufitare të Kapshticës, mjetin tip “Passat” që drejtohej nga Lorenc Lika, duke mos ju nënshtruar procedurave të kontrollit.
Në këto pamje filmike tregohet qartë se krye-komisari i kufirit Stiljan Pasho, ka udhëtuar nga Korça në Kapshticë në këtë makinë, duke qëndruar në vendin e parë. Në këtë moment Pasho zbret nga makina dhe drejtohet tek grupi i policëve të kontrollit.
Ndërsa në këtë moment nga dera e pasme e “Passatit” del një person me bluzë të verdhë duke hyrë sërish në makinë, pikërisht në vendin e parë ku qëndronte shefi i kufirit, Stiljano Pasho.
Pasho drejtohet tek pika e kontrollit dhe urdhëron policët që të kontrollojnë një makinë tip “Benz-Mercedez”, pasi kishte informacion se në mjet mund të kishte sende të paligjshme.
Teksa policët kontrollonin mjetin tip “Benz”, në pamjet filmike duket qartë se si Stiljano Pasho, largohet për një çast nga grupi i kontrollit dhe shkon ngadalë tek “Passati”.
Ai flet diçka me drejtuesin e mjetit Lorenco Lika dhe ky i fundit nxjerr “Passatin” nga radha e pritjes.
Por këto lëvizje ranë në sy të policëve grekë të cilët sapo “Passati” mbërriti në pikën doganore të tyre, ushtruan një kontroll të imtësishëm duke arritur të gjejnë plot 26 kg drogë.
Grekët arrestuan Lorenco Lika dhe pas tij edhe personin që kishte dalë për të pritur sasinë e drogës.
E gjitha ka ndodhur në 27 nëntor 2023, ndërsa pas dy ditësh është bërë nga AMP Korçë dhe prokuroria e qytetit, arrestimi i shefit të kufirit për qarkun e Korçës, Stiljano Pasho.
