Policia e Korçës ka shpallur në kërkim shtetasen V. K., 43 vjeçe, banuese në Vlorë, dhe ka nisur procedim penal në gjendje të lirë për shtetasin R. A., 29 vjeç, banues në fshatin Vashtmi, pas dyshimeve se kanë kanosur një qytetar për qëllime përfitimi pasuror.
Nga hetimet paraprake rezulton se ata i kanë dërguar mesazhe kërcënuese shtetasit E. L., të cilat dyshohet se kanë ndikuar në rëndimin e gjendjes së tij psikologjike dhe tentativën për vetëvrasje më datë 28.06.2025, përmes konsumimit të një substance kimike (klor).
Gjatë kontrollit në banesën e 29-vjeçarit u sekuestruan një armë sportive e mbajtur pa leje dhe një shumë eurosh të dyshuara si të falsifikuara.
Policia po vijon punën për kapjen e shtetases V. K. dhe, nën drejtimin e Prokurorisë, për dokumentimin e plotë të këtij rasti me prova ligjore.
