Ish-deputeti demokrat, Dashnor Sula në një dalje televizive ka folur për kërkesën e opozitës për shkarkimin e kryeparlamentarit Niko Peleshi.
Sula tha se kjo kërkesë nuk bën sens. Peleshi u cilësua nga Sula, si një njeri serioz që është model për politikanët.
Sula u shpreh se kërkesa nuk ka një indicie kryesore.
“Në thelb nuk bën sens se nuk ka mbushur dy muaj si kryetar Kuvendi dhe unë për sa kohë që jam në politikë por edhe gjatë periudhës që kam qenë aty, bëhet fjalë për një njeri serioz dhe të qetë, një njeri që është model për politikanët. Mendoj se në gjithçka është njeri korrekt. Nuk besoj që ka indicie kryesore që do të duhej që të kishte nismë për shkarkimin e tij. Por eksitojnë manovrat politike mes mazhorancës dhe opozitës.Duhen parë dhe procedurat sesi ka ndodhur problematika që opozita ngre me kaq forcë. Nuk mund të ndodhi se nuk mund të sillet opozita si mazhorancë. Opozita duhet të jetë serioze, këto i bën kur e di që ka numra, e di që e rrezikon postin e kryetarit të parlamentit”, u shpreh Sula.
Ish-deputeti Sula foli gjithashtu dhe për garën në Bashkinë e Tiranës, ku tha se të gjithë kandidatët kanë anë pozitive dhe negative.
Në lidhje me garën, Sula tha se do të ishte mirë që të ishte më politike. Sula u shpreh se deri tani kandidatët me platformat e tyre po ecin me frena dore.
“Ajo bukë që na serviret tani, nuk është më e mirë e mundshme. Por as më e keqja. E shikoj midis një normaliteti sesa një të mirë të madhe, për të gjithë kandidatët. Secili kandidat ka anën e tij pozitive dhe problematike që i shoqëron. Do doja të kishim një garë më politike. Mospasja e një petku të fortë politik, e dëmton. Manastirliu ka anën politike të fortë. Nëse do të kemi zgjedhje, kuptohet që do të jetë më e qartë, dhe nga platforma, se deri tani me frena dore po ecin. Duhet transparencë 100%”, tha Sula./CNA
