Qarku i Korçës vijon të mbetet një nga vatrat më të rëndësishme të artit dhe kulturës shqiptare, duke nxjerrë ndër breza artistë që kanë ruajtur dhe përcjellë identitetin tonë kulturor. Në një ceremoni solemne dhe mjaft emocionuese, e cila tashmë është kthyer në traditë, Këshilli i Qarkut Korçë ka akorduar Certifikata Mirënjohjeje për artistë nga të gjitha bashkitë e qarkut.
Certifikatat u dorëzuan nga kryetari i Këshillit të Qarkut Korçë, z. Petrika Tollkuçi, si vlerësim për kontributin e tyre të veçantë dhe të spikatur ndër vite në ruajtjen dhe promovimin e vlerave kulturore-tradicionale të krahinës. Ky moment shërbeu jo vetëm si një shprehje mirënjohjeje institucionale, por edhe si një falënderim publik për punën, përkushtimin dhe pasionin e artistëve ndër vite.
Me motivacionin: “Për kontribut të veçantë, të spikatur ndër vite në përcjelljen dhe ruajtjen e vlerave kulturore-tradicionale të Qarkut Korçë”, Këshilli i Qarkut Korçë shprehu mirënjohjen për artistët: Lirika Pojani (kostumografe), Agim Malelli (valltar), Vladimir Xega (këngëtar), Luljeta Milo (valltare), Tahir Mëhalla (këngëtar), Myftar Mane (këngëtar), Roza Dhami (këngëtare), Albert Çelanji (koreograf), Hekuran Pere (instrumentist), Pandelina Kambo-Vurmo (valltare), Menka Naumi Tërpo (valltare), Marsel Muzikanti (instrumentist), Hamdie Laska (këngëtare), Xhevdet Zeqo (instrumentist) si dhe Maksim & Ermioni Sinollari (koreografë).
Këshilli i Qarkut Korçë riafirmon përmes këtyre vlerësimeve angazhimin për të mbështetur artin, kulturën dhe trashëgiminë shpirtërore, duke nderuar ata që kanë kontribuar në ruajtjen e identitetit kulturor të zonës dhe në pasurimin e jetës artistike të qarkut.
