Kolendrat, një nga traditat më të vjetra popullore të zonës së Rehovës, vijojnë të ruhen si pjesë e trashëgimisë shpirtërore që lajmëron ardhjen e Krishtlindjes dhe uron begati për vitin e ri. Në prag të festës, fëmijët këndojnë këngën tradicionale të kolendrave dhe trokasin në dyert e shtëpive, duke ringjallur një ritual të trashëguar ndër breza.
Sipas traditës, fëmijët lëvizin nga një shtëpi në tjetrën, duke kënduar këngë të vjetra karakteristike dhe duke mbajtur me vete xholen dhe torbën. Kur dera hapet, ata shpërblehen me dhurata simbolike si fruta, kulace apo produkte bujqësore, shenjë e bollëkut dhe mirësisë për vitin që vjen.
Edmira Tërpo dhe Vali Cukali, banorë të Rehovës, kujtojnë me nostalgji festimet e dikurshme, kur Kolendrat përfshinin të gjithë fëmijët e fshatit dhe shënonin një moment gëzimi të veçantë për komunitetin. Ata theksojnë se kjo festë simbolizon lindjen e Krishtit, ardhjen e bukës së re dhe fillimin e një cikli të ri jetësor.
Megjithëse me kalimin e viteve tradita është zbehur, banorët shprehin dëshirën që Kolendrat të mos humbasin, por të rikthehen si një festë që bashkon brezat dhe rikthen fëmijët e larguar nga emigracioni.
Kolendrat festohen çdo vit nga data 20 deri më 24 dhjetor, në vigjilje të Krishtlindjes, duke mbetur një simbol i gjallë i kulturës dhe identitetit lokal.
