Kryetari i Bashkisë së Korçës, Sotiraq Filo, ka pritur në një takim zyrtar në ambientet e bashkisë kryetarin e Bashkisë së Kosturit (Greqi), Giannis Korentsidis. Takimi u zhvillua në një atmosferë miqësore dhe u fokusua në forcimin e marrëdhënieve ndërmjet dy qyteteve fqinje.
Gjatë diskutimeve, palët theksuan rëndësinë e bashkëpunimit në fusha si kultura, arti, sporti dhe turizmi, duke identifikuar gjithashtu mundësitë për zhvillimin e projekteve të përbashkëta që mund të mbështeten nga fondet e Bashkimit Europian.
“Korça dhe Kosturi ndajnë një histori të hershme bashkëpunimi dhe jemi të vendosur ta çojmë këtë marrëdhënie edhe më tej me projekte konkrete që sjellin përfitime reale për qytetarët tanë”, u shpreh kryebashkiaku Filo pas takimit.
Ky takim është një tjetër hap drejt thellimit të marrëdhënieve ndërkufitare dhe nxitjes së zhvillimit rajonal përmes shkëmbimeve institucionale dhe bashkëpunimeve strategjike.
