Kryetari i Bashkisë Korçë, Sotiraq Filo, ka marrë pjesë në një takim pune të organizuar nga Ministria e Turizmit dhe Mjedisit, ku ishin të pranishëm Kryetari i Bashkisë së Chambéry-së dhe ish-ministër francez, z. Thierry Repentin, Ambasadorja e Francës në Shqipëri, znj. Catherine Suard, si dhe përfaqësues të Agjencisë Franceze të Zhvillimit (AFD).
Gjatë takimit, u diskutua mbi dy projekte të rëndësishme për rajonin e Korçës:
• Zhvillimi i Master Planit të Turizmit të Qëndrueshëm, që synon një qasje të re për promovimin e turizmit cilësor, me fokus te ruajtja e mjedisit dhe trashëgimisë kulturore;
• Trajnimi profesional në fushën e turizmit, në bashkëpunim me institucionin francez “Campus des Métiers d’Excellence” të Nisës, për të përgatitur burime njerëzore të kualifikuara dhe konkurruese në këtë sektor.
Ky bashkëpunim vjen në kuadër të marrëveshjes mes qeverisë shqiptare dhe asaj franceze dhe përfaqëson një hap konkret drejt zhvillimit të qëndrueshëm ekonomik dhe social të rajonit të Korçës.
