Korça mbetet destinacioni i preferuar i turistëve vendas dhe të huaj në të gjitha stinët e vitit. Por muajt e verës shënojnë numrin më të lartë të vizitorëve. Ndërkohë që prej fillimit të këtij viti e deri tani muzetë e Korçës janë vizituar nga mbi 21 mijë persona. Për Muzeun Kombëtar të Artit Mesjetar ata që tregojnë më shumë interes janë turistët e huaj nga shtete të ndryshme të Europës.
Sa i përket Muzeut të Arsimit ai vizitohet kryesisht nga turistët vendas, por nuk mungojnë edhe ata nga Kosova dhe Maqedonia e Veriut, teksa Muzeu Arkeologjik frekuentohet më shumë nga të huajt.
Shifrat zyrtare tregojnë se Korça ka mikpritur deri tani gati dyfishin e turistëve, krahasuar me të njëjtën periudhë të vitit të kaluar, teksa pritet që edhe muajt në vijim të shënojnë një numër të lartë vizitorësh.
