Korça çel zyrtarisht sezonin e festave të fundvitit këtë të shtunë, më 6 dhjetor, me ndezjen e dritave dhe dekorimeve që do të shndërrojnë qytetin në një prej destinacioneve më të vizituara të dimrit në Shqipëri. Ceremonia do të mbahet në orën 18:00, në zonën këmbësore, ku pritet të mblidhen qindra qytetarë dhe vizitorë për të përjetuar atmosferën e magjisë që Korça sjell çdo vit.
Për më shumë se një muaj, deri në fillim të janarit, qyteti do të jetë i mbushur me aktivitete, instalacione drite, muzikë dhe evente kulturore, duke e kthyer Korçën në një qendër të vërtetë festive. Bashkia e Korçës ka paralajmëruar surpriza të këndshme për fëmijët dhe familjet, ndërsa tregjet e fundvitit dhe shëtitjet tradicionale pritet të sjellin gjallërinë karakteristike të sezonit.
Korça, e njohur për traditën, mikpritjen dhe ngrohtësinë e saj, synon që edhe këtë vit të mirëpresë mijëra vizitorë nga e gjithë Shqipëria dhe më gjerë, duke e bërë qytetin një destinacion të paharrueshëm në këtë periudhë të vitit.
