Gjatë 24 orëve të fundit, reshjet me intensitet mesatar kanë përfshirë qarkun e Korçës, por situata paraqitet e qetë dhe nën monitorim të vazhdueshëm nga strukturat vendore. Autoritetet njoftojnë se nuk ka problematika madhore, ndërsa dy rastet e izoluara të shfaqura mbrëmjen e kaluar në bashkinë Kolonjë dhe përgjatë aksit Ersekë–Leskovik u zgjidhën menjëherë nga ekipet në terren.
Sipas ARRSH Rajoni Qendër–Lindje, të gjitha akset rrugore në qark janë të hapura për qarkullim, megjithëse në disa segmente janë evidentuar grumbullime të ujit dhe prezencë inertesh. Aksi Qukës–Qafë Plloçë mbetet nën vëzhgim të rregullt për shkak të terrenit të ndjeshëm ndaj reshjeve.
Situata e energjisë elektrike Sipas njoftimit të OSHEE, për shkak të erës dhe reshjeve janë aktualisht pa energji elektrike 776 abonentë në këto zona:
Fideri Vithkuq – N/St Rehovë: 289 abonentë
Fideri Potgozhan – N/St Gur i Kuq: 130 abonentë
Fideri 3 – N/St Ersekë: 100 abonentë
Fideri JO6 – N/St Leskovik: 257 abonentë
Të gjithë fiderat që furnizojnë konsumatorë të rëndësisë së veçantë janë funksionalë. Gjithashtu, hidrovori i Pogradecit operon normalisht.
Grupet operative të OSHEE dhe strukturave vendore ndodhen në terren dhe po punojnë për rikthimin sa më të shpejtë të energjisë elektrike dhe sigurimin e normalitetit në zonat e prekura.
