Me nisjen e pranverës, qyteti i Korçës po merr një pamje të re përmes mbjelljes së luleve shumëngjyrëshe në hapësirat publike. Fushata e gjelbërimit ka nisur nga lulishtja “Naim Frashëri” dhe do të vijojë në lulishten “Themistokli Gërmenji”, në bllokun “Rinia”, lagjet 13, 14 dhe 15, si dhe në rrethrrotullimet e qytetit.
Sipas Berti Kitës, përgjegjës për gjelbërimin pranë Bashkisë Korçë, brenda dy javëve të ardhshme parashikohet të mbillen rreth 50 mijë fidanë, të siguruar nga fidanishtja e bashkisë. Llojet e luleve përfshijnë lulen e zjarrit, petunjen, kadifen, gaillardën, zinian, godecian e shumë të tjera.
“Ky proces përsëritet dy herë në vit, në pranverë dhe në dimër, kur mbillen lule sezonale si vjola, lule dele, kanamiciri dhe geume”, u shpreh Kita.
Mirëmbajtja e hapësirave të gjelbra vlerësohet nga qytetarët, sidomos nga mosha e tretë, që i frekuenton rregullisht për relaks dhe ajër të pastër. Fëmijët gjithashtu gjejnë hapësira argëtimi në këto ambiente të gjelbëruara, që rrisin cilësinë e jetës urbane.
Në total gjatë vitit, Ndërmarrja e Shërbimeve Publike ka mbjellë mbi 1 mijë fidanë lulesh dekorative, duke bërë Korçën një nga qytetet më të kuruara në aspektin e gjelbërimit dhe estetikës urbane.
