Policia e qarkut Korçë ka kryer një sërë veprimesh hetimore dhe arrestimesh gjatë 24 orëve të fundit, në kuadër të forcimit të rendit dhe sigurisë publike.
Specialistët e Sektorit të Qarkullimit Rrugor arrestuan në flagrancë shtetasin P. Zh., 34 vjeç, banues në fshatin Shëngjergj, pasi u kap duke drejtuar automjetin në gjendje të dehur.
Ndërkohë, në vijim të hetimeve për aksidentin e ndodhur në aksin “Korçë–Ersekë”, ku u plagos K. Ç., 40 vjeç, u bë e ditur se drejtuesi i automjetit ishte në gjendje të dehur. Për këtë rast, ndaj tij ka nisur procedim penal në gjendje të lirë. Po ashtu, policia ka nisur hetimet edhe për një kallëzim të bërë nga shtetasja Dh. K., 74 vjeçe, e cila pretendon se është aksidentuar lehtë nga një automjet në lagjen nr. 18 të Korçës.
Shërbimet e Komisariatit të Policisë Korçë kanë referuar materialet në Prokurori për shtetasen S. S., 31 vjeçe, banuese në Tiranë, e cila dyshohet se ka shkelur vendimin e Gjykatës duke mos lejuar ish-bashkëshortin të takojë vajzën e tyre të mitur.
Gjithashtu, është shpallur në kërkim një 17-vjeçar, i dyshuar për vjedhjen e një shume parash në një dyqan në lagjen nr. 17.
Në Pogradec, ka nisur procedim penal ndaj shtetasit E. F., 46 vjeç, pas një kallëzimi të bërë nga një 70-vjeçar, i cili pretendon se i është instaluar një kamerë në ambientet e biznesit të tij.
Ndërkohë, në Kolonjë, më datë 2 nëntor, një 65-vjeçar me iniciale S. M. është dërguar pa shenja jete në spital nga familjarët e tij. Nga hetimet paraprake dyshohet se vdekja ka ardhur për shkaqe natyrale.
Nga ana tjetër, specialistët për Hetimin e Krimeve në DVKM Korçë kanë kapur shtetasin E. B., 29 vjeç, banues në fshatin Pirg, i shpallur më herët në kërkim nga Komisariati i Maliqit për veprën penale “Dhunimi i banesës”.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
