Specialistët e Sektorit të Qarkullimit Rrugor në Drejtorinë Vendore të Policisë Korçë kanë ndërhyrë në tre raste të shkeljeve të rënda të Kodit Rrugor:
Shtetasi M. L., 40 vjeç, banues në fshatin Bulgarec, u arrestua në flagrancë pasi, duke drejtuar automjetin në gjendje të dehur, përplasi një automjet të parkuar.
Ndaj shtetasit S. R., 62 vjeç, banues në fshatin Zvezdë, ka nisur procedim penal pasi u kap duke drejtuar një motomjet pa leje drejtimi.
Në Devoll, shtetasi A. B., 28 vjeç, humbi kontrollin e automjetit që drejtonte, duke bërë që mjeti të dilte nga rruga. Si pasojë e aksidentit u dëmtuan lehtë vetë drejtuesi dhe nipi i tij i mitur, pasagjer në automjet.
Materialet për këto raste janë referuar në Prokurori pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
Policia e Korçës apelon për respektimin e rregullave të qarkullimit dhe kujdes maksimal në drejtimin e mjeteve, për të shmangur ngjarje që rrezikojnë jetën dhe sigurinë e qytetarëve.
