Nën masa të rrepta sigurie, është shoqëruar sot në Gjykatën e Korçës Ilirjan Selmani, 31-vjeçari i dyshuar për vrasjen e 52-vjeçares Kozeta Teço, ngjarje që tronditi qytetin e Pogradecit dhe mbarë opinionin publik disa ditë më parë.
Selmani do të dalë para trupit gjykues për t’u njohur me masën e sigurisë që do të caktohet ndaj tij nga gjykata. Arrestimi i tij erdhi pas hetimeve intensive të kryera nga policia dhe prokuroria, që arritën të identifikonin dhe ndalonin të dyshuarin brenda një kohe të shkurtër.
Në seancën për caktimin e masës së sigurisë, prokuroria ka paraqitur një sërë provash që rëndojnë pozitën e Selmanit. Një ndër provat kryesore janë analizat laboratorike të kryera mbi mostrat e marra nga veshjet e tij, të cilat kanë konfirmuar se njollat e gjakut në pantallonat e Selmanit i përkasin viktimës, Kozeta Teço.
Po ashtu, një tjetër provë kyçe janë pamjet filmike të siguruara nga kamerat e sigurisë së bizneseve përreth, ku Selmani shihet teksa hyn dhe del nga banesa e viktimës. Në video, ai shihet gjithashtu duke hedhur një qese me veshje të përgjakura në një kazan mbeturinash pranë zonës ku ndodhi krimi.
Hetimet për zbardhjen e plotë të ngjarjes vijojnë, ndërsa autoritetet theksojnë se do të ndjekin çdo pistë që ndihmon në zbardhjen e plotë të këtij krimi të rëndë.
