Në Korçë ka përfunduar Olimpiada e 19-të Ballkanike Studentore të Matematikës, e organizuar për herë të parë në Shqipëri nga Shoqata e Matematikës në Europën Juglindore. Olimpiada mblodhi në qytetin juglindor 111 studentë nga 27 universitete të vendeve si Shqipëria, Greqia, Maqedonia e Veriut, Bullgaria, Rumania dhe Turkmenistani.
Për Ardian Naçon, kryetar i Shoqatës Shqiptare të Matematikës, organizimi i kësaj olimpiade nuk ka qenë i lehtë për shumë arsye, por rëndësi ka që gjithçka u përmbyll me sukses.
Ardian Naço:
“Ka qenë një sfidë për të organizuar një ngjarje të tillë të përmasave ndërkombëtare, por me përkushtim dhe mbështetje, kemi arritur ta realizojmë me sukses.”
I pyetur për nivelin e studentëve shqiptarë në këtë olimpiadë, Naço pranoi se ka ende hapësira për përmirësim dhe se pjesëmarrja e vazhdueshme në nivele të tilla është e rëndësishme për rritjen e performancës.
Ardian Naço:
“Studentët shqiptarë kanë potencial të madh, por u mungon përvoja në kompeticione të tilla ndërkombëtare. Nevojitet më shumë angazhim dhe mbështetje për të arritur rezultate më të mira në të ardhmen.”
Ndërkohë, një nga studentët ekselentë nga Turkmenistani, Oguz Han, u shpreh i befasuar nga niveli i studentëve shqiptarë dhe nga mikpritja që iu është ofruar gjatë qëndrimit në Shqipëri.
Oguz Han:
“Vij nga Antalya dhe për mua është hera e parë që vij në Shqipëri, ndonëse në olimpiada të tilla kam marrë pjesë disa herë. Më ka bërë shumë përshtypje mikpritja dhe zgjuarsia e të rinjve shqiptarë. Matematika na është thënë se nuk është shumë e zhvilluar në Shqipëri, por të rinjtë që kam takuar këtu janë shumë premtues. Besoj se do të vij sërish në Shqipëri, por këtë herë për turizëm.”
Ceremonia e ndarjes së medaljeve për studentët më të mirë është mbajtur mbrëmë në teatrin “Andon Zako Çajupi”. Ajo që ra në sy ishte fakti se asnjë student shqiptar nuk është vlerësuar me medalje në këtë olimpiadë, duke reflektuar nevojën për më shumë mbështetje dhe përgatitje në këtë fushë.
