Drejtoria Vendore për Kufirin dhe Migracionin Korçë ka goditur dy raste të paligjshmërive në kufi, të evidentuara gjatë kontrolleve të imtësishme në bazë të analizës së riskut, në pikën kufitare Qafë Thanë dhe atë të Goricës.
Në PKK Qafë Thanë, shërbimet kufitare zbuluan një shtetas maroken të fshehur nën rimorkion e një kamioni që drejtohej nga shtetasi V. T., 30 vjeç, banues në Maqedoninë e Veriut. Ky i fundit po hetohet në gjendje të lirë për veprën penale “Ndihma për kalim të paligjshëm të kufijve”.
Ndërsa në PKK Goricë, gjatë kontrollit të automjetit të drejtuar nga shtetasi T. A., 63 vjeç, banues në fshatin Zaroshkë, u konstatuan produkte ushqimore dhe medikamente pa fatura blerjeje. Për këtë rast, nisi procedimi në gjendje të lirë për veprat penale “Kontrabanda me mallra të tjera” dhe “Tregtimi dhe transportimi i mallrave që janë kontrabandë”. Mallrat u sekuestruan në cilësinë e provës materiale.
Autoritetet theksojnë se kontrollet ndaj paligjshmërive në kufi dhe tentativave për lëvizje të paligjshme do të vijojnë paralelisht me ofrimin e një shërbimi policor efikas dhe etik për qytetarët.
Materialet procedurale për të dy rastet janë referuar Prokurorisë së Korçës për veprime të mëtejshme.
