Në kuadër të Festivalit Folklorik Maqedonas “Prespa 2025”, që u zhvillua me pjesëmarrje të gjerë në Pustec, Kryetari i Bashkisë së Pustecit, z. Pali Kolefski, priti me nderime Kryeministrin e Maqedonisë së Veriut, z. Hristijan Mickoski.
Vizita u zhvillua në një atmosferë festive dhe vëllazërore, ku u theksua rëndësia e ruajtjes së trashëgimisë kulturore, gjuhës dhe identitetit maqedonas, si dhe forcimi i marrëdhënieve miqësore ndërmjet komuniteteve përtej kufirit.
Të pranishmit patën mundësinë të ndjekin performanca autentike folklorike, që pasqyruan pasurinë shpirtërore dhe traditat e trashëguara të rajonit të Prespës.
Kryetari Kolefski shprehu mirënjohjen për praninë e Kryeministrit Mickoski dhe mbështetjen e vazhdueshme të shtetit maqedonas ndaj komunitetit maqedonas në Shqipëri. Ai theksoi se ky bashkëpunim është i rëndësishëm jo vetëm për ruajtjen e identitetit kulturor, por edhe për nxitjen e zhvillimit lokal dhe forcimin e lidhjeve ndërkufitare.
“Pusteci është një urë miqësie dhe bashkëjetese, ku traditat ruhen me krenari dhe ku marrëdhëniet ndëretnike janë një shembull i bashkëpunimit dhe respektit të ndërsjellë,” u shpreh z. Kolefski gjatë fjalës së tij.
Vizita e Kryeministrit Mickoski në Pustec u përshëndet gjerësisht nga banorët dhe pjesëmarrësit në festival, duke shënuar një moment domethënës për afrim dhe bashkëpunim të mëtejshëm mes Maqedonisë së Veriut dhe komunitetit maqedonas në Shqipëri.
