Kryeministri Edi Rama ka nisur sot takimet kokë më kokë me drejtuesit politikë të Partisë Socialiste për të finalizuar listat e kandidatëve për deputetë në zgjedhjet e 11 majit. Takimet kanë nisur që prej orës 09:30, ku Rama sapo ka mbërritur në ambientet e Vilës Qeveritare.
Burime pranë PS-së bëjnë me dije se të deleguarit politikë i kanë dorëzuar tashmë kryeministrit listat paraprake, por në takimet që po zhvillohen do të diskutohet në detaje për të gjithë emrat e përfshirë në listë. Diskutimet do të përfshijnë si kandidatët e vendosur në listën e hapur, ashtu edhe ata në listën e mbyllur.
Pasi të përmbyllen këto konsultime, do të duhet të mblidhet kryesia e PS-së për të vendosur vulën përfundimtare mbi ekipin që do të garojë në zgjedhjet e 11 majit. Lista zyrtare e kandidatëve do të dorëzohet më pas në Komisionin Qendror të Zgjedhjeve (KQZ) brenda datës 12 mars, në përputhje me afatet ligjore.
Këto lëvizje janë pjesë e përgatitjeve intensive të PS-së për zgjedhjet, ku pritet që gara të jetë e fortë në të gjithë vendin.
