Kryepiskopi i Tiranës, Durrësit dhe i gjithë Shqipërisë, Fortlumturia e Tij, Imzot Joani, u prit në vizitë zyrtare nga Tërëshenjtëria e Tij, Patriarku Ekumenik Vartholome, në selinë e Fanarit në Stamboll.
Kjo vizitë u zhvillua në kuadër të traditës së Kishës Orthodhokse, ku një primat i sapozgjedhur bën vizita vëllazërore në Kishat motra, duke nisur me Fronin Ekumenik, si qendra historike dhe shpirtërore e Orthodhoksisë Botërore.
Gjatë fjalës së tij përshëndetëse, Kryepiskopi Joani shprehu mirënjohjen për mikpritjen dhe rolin e rëndësishëm që Patriarkana Ekumenike ka luajtur në historinë dhe ringritjen e Kishës Orthodhokse Autoqefale të Shqipërisë. Ai kujtoi me nderim dhënien e autoqefalisë në vitin 1937 dhe rolin vendimtar të Patriarkanës në rindërtimin e Kishës shqiptare pas periudhës së errët të ateizmit totalitar, përmes dërgimit të Episkopit Anastas, i cili më vonë u bë Kryepiskop dhe themelues i epokës së re kishtare në vend.
Imzot Joani theksoi edhe rrënjët apostolike të Orthodhoksisë shqiptare, duke përmendur misionin e Apostull Palit në Ilirik dhe lidhjet historike e shpirtërore me Kishën e Madhe të Krishtit në Kostandinopojë.
Në fund të fjalës së tij, ai vlerësoi rolin bashkues të Patriarkanës Ekumenike në ruajtjen e unitetit midis Kishave Orthodhokse, si dhe në përballjen me sfidat e kohës moderne, duke shprehur lutje dhe urime për vijimësinë e shërbesës së Patriarkut Vartholome.
