Kryepiskopi Joan mëngjesin e kësaj të shtune është ftuar në podkastin e kryeministrit Edi Rama ku ka përcjellë mesazhe të forta për jetën dhe njeriun.
Fortlumturia e Tij Joani foli për zgjedhjen e tij për t’iu dedikuar Zotit.
Kryepiskopi u shpreh: “Përderisa Zoti e hapi si rrugë e mendova ta çoj deri në fund”.
Më tej Kryepiskopi Joan dha mesazhin se dija më e madhe është të njohim thellë veten dhe Zotin.
“Të gjithë njerëzit e kanë dimensionin shpirtëror brenda. Çdo njeri është krijuar sipas ikonës së Perëndisë ndaj dhe nxitet respektimi i çdo qenieje njerëzore. Duke lexuar shumë kupton se njerëzit nuk janë shumë larg me njëri-tjetrin.
Të gjithë njerëzit kanë një të përbashkët me njëri-tjetrin. Kultura njerëzore ka diçka të përbashkët, por duhet punuar si bleta që shkon në çdo lule për të formuar mjaltin dhe nuk merr gjithçka, por ato që i duhen për të marrë.
Kërkimi është për të marrë gjithçkanë e diçkaje. Njeriu nuk është një mekanizëm, ka uljet dhe ngritjet e tij. Nëse lexojmë psalmet e Shën Davidit, aty shpjegohen të gjitha, gëzimi, etj., që tregon se jeta e njeriut do t’i ketë të gjitha proceset.
Nuk besoj se shkenca është në kundërshtim me fenë, ajo zhvillohet në fakte të dukshme. Besimi ka diçka të padukshme. Njeriu ka një trup që është i dukshëm dhe një shpirt që është i padukshëm. Problemi është çfarë kuptojmë me shkencën. Dija më e madhe është që njeriu të njohë thellë veten dhe Zotin. Kërkimi për të njohur thellë veten do të thotë se nuk je në kundërshtim të madh me shkencën.
Bota shpirtërore nuk mund të kuptohet vetëm me arsye”, deklaroi Kryepiskopi Joan.
