Në fundjavë, në sallën e Farkës do të startojë aktiviteti i parë zyrtar i sezonit të ri të volejbollit për femra: Kupa e Federatës Shqiptare. Katër skuadrat pjesëmarrëse janë Tirana, Partizani, Skënderbeu dhe Pogradeci, ekipe që do të masin forcat në gjysmëfinalet e së premtes.
Shorti ka rezervuar menjëherë një derbi të zjarrtë, ku Tirana dhe Partizani do të përballen për një vend në finale. Ndërkohë, çifti tjetër gjysmëfinal do të jetë Skënderbeu – Pogradeci, një sfidë që pritet me interes të madh, sidomos nga liqenoret, që këtë vit drejtohen nga trajneri Besnik Lisha. Ai ka në dispozicion një grup lojtare të gatshme për të synuar trofetë madhorë të sezonit.
Nga ana tjetër, Skënderbeu është përforcuar ditët e fundit me lojtare të huaja, duke rritur konkurrueshmërinë dhe ambiciet për sukses.
Ndeshjet e Kupës së Federatës do të luhen me sistem eleminimi direkt, duke ofruar emocione të forta që në start të sezonit.
