Prokurori Vladimir Mara është caktuar si përfaqësues i Prokurorisë së Posaçme Kundër Korrupsionit dhe Krimit të Organizuar (SPAK) në qarkun e Korçës për zgjedhjet e 11 majit.
Mara ka një karrierë të gjatë në sistemin e drejtësisë shqiptare, duke filluar si oficer i policisë gjyqësore në Prokurorinë e Krimeve të Rënda në vitin 2003, më pas si prokuror në Durrës në vitin 2008, dhe që nga viti 2016, si prokuror në Prokurorinë për Krime të Rënda. Ai është gjithashtu një nga prokurorët që hetoi dosjen e njohur “339”, e cila përfshinte hetime mbi ndërhyrjet e krimit të organizuar në proceset zgjedhore në Shqipëri.
Në qershor të vitit 2019, Mara iu nënshtrua procesit të vettingut nga Komisioni i Pavarur i Kualifikimit (KPK). Sipas raportit të Inspektoratit të Lartë të Deklarimit dhe Kontrollit të Pasurive dhe Konfliktit të Interesit (ILDKPKI), ai nuk kishte fshehur pasuri dhe nuk kishte konflikt interesi, duke justifikuar me burime të ligjshme pasurinë e tij.
Megjithatë, gjatë seancës dëgjimore, u ngritën disa pyetje lidhur me përdorimin e një automjeti të paregjistruar në Shqipëri, të cilin Mara e sqaroi duke thënë se kishte pasur prokurë nga kushëriri për përdorimin e tij dhe se kishte tentuar ta regjistronte, por nuk kishte qenë e mundur.
