Është miratuar së fundimi projekti i muzeut në nder të shkrimtarit tonë Dritëro Agolli.
Ka qenë kryetari i Këshillit të Qarkut, Erjon Nexhip, ai që ka dhënë lajmin e mirë për këtë projekt. Figurat si Dritëro Agolli meritojnë shumë, ndaj ky muze do të jetë një bazë për promovimin letrar, historik dhe kulturor jo vetëm të Dritëroit por edhe të zonës së Devollit.
Ja çfarë ka njoftuar Këshilli i Qarkut;
Me një angazhim të palëkundur për zhvillimin kulturor dhe ekonomik të rajonit tonë, Këshilli i Qarkut Korçë, në bashkëpunim të ngushtë me Bashkinë Devoll, ka marrë vendimin për të nisur procedurat për ndërtimin e Muzeut “Dritëro Agolli” në Menkulas. Ky vendim është një shprehje e qartë e përkushtimit tonë për të ruajtur dhe promovuar vlerat kombëtare dhe trashëgiminë kulturore-artistike të rajonit tonë.
Muzeu “Dritëro Agolli” do të jetë një monument i denjë për një nga figurat më të shquara të letrave shqipe, një vend ku historia, kultura dhe traditat do të ndërthuren për të frymëzuar brezat e ardhshëm.
Bashkëfinancim nga Këshilli i Qarkut (60%) dhe Bashkia Devoll (40%)—Një shembull i qartë i fuqisë së bashkëpunimit për arritjen e synimeve të përbashkëta
Hedhim bazat për të siguruar që ky muze të jetë një qendër edukative dhe kulturore, që do të ruajë dhe promovojë vlerat dhe identitetin tonë kombëtar.
