3000 banorë të njësisë administrative Leskovik në bashkinë e Kolonjës vuajnë mungesën e mjekëve.
Momentalisht qendra shëndetësore e qytetit të Leskovikut ka vetëm një mjeke dhe ajo është pensioniste.
Në kushte të tilla, banorët janë të detyruar të udhëtojnë drejt spitalit të Ersekës dhe në të shumtën e rasteve drejt spitalit rajonal të Korçës për të kërkuar ndihmën mjekësore.
Një gjë e tillë pranohet nga mjekja Hyrije Hida, e cila thotë se e vetmja gjë që mbetet për të bërë është dhënia e ndihmës së parë mjekësore dhe rekomandimi për të shkuar në spitalin e Kolonjës.
“Do marrësh rekomandim e do shkosh tek mjeku specialist në spitalin e Ersekës ose më shumë në Korçë, në spitalin rajonal. Kaq banorë ka faktikisht, mirë është të ketë por çdo gjë është e kufizuar, popullata, emigrimi, probleme të ndryshme si në gjithë vendin. Këtu qendra shëndetësore jemi turn i parë deri në orën 14:30” – thotë Hyrije Hida.
Banorët e njësisë administrative Leskovik tregojnë se dikur shërbimi spitalor në këtë qytet ka qenë i plotësuar ndërsa tani janë të detyruar të udhëtojnë për më tepër se dy orë për të marrë ndihmë mjekësore.
“Më parë kishte por tani zoti vente dorën. Si ja bëjme? Kush ka shëndet, e kapërcen. Ndryshe vdis. Po qysh? Vdis ore. Ku të shkosh? Po gjeta makinën shkoj ndryshe ngordh në shtëpi” shprehet pensionisti i zonës.
“Këtu nuk ka mjek. Kemi një mjeke pensioniste, shikon ndonjë gjë të thjeshtë, ndonjë sëmundje, ndonjë recetë e shkon në Erseka. Erseka na çon në Korçë, disa ikin ne Përmet, disa në Greqi. Këtu shteti duhet të vërë dorën, të paktën të sjellë specialistin në ditë të caktuara. Kështu e mendoj unë,” – shprehet e moshuara.
“Këtu është vendosur tani qe për te marre një analizë në Ersekë, të shkosh në Barmash. Merre me mend qarkullimi. Shumë vështirë, kanë hapur një laburant privat këtu për analiza por është i shtrenjtë. Do ikesh me autobus në Korçë, është shumë e vështirë.”
Mungesë mjekësh ka dhe në spitalin e Ersekës, kryesisht mjekëve specialistë.
