Superliga e volejbollit për femra ka mbyllur të shtunën javën e dhjetë me takimin mes Pogradecit dhe Barletit. Një përballje pa shumë histori, e dominuar nga skuadra liqenore, e cila fitoi me rezultatin e pastër 3-0.
Me disa afrime në merkaton e dimrit, Pogradeci e ka rritur ndjeshëm nivelin e ekipit, ndërsa ndaj Barletit për të ishte gjithçka e thjeshtë.
Skuadra liqenore, e drejtuar nga trajner Besnik Lisha, e filloi lojën vrullshëm, duke u shkëputur menjëherë në pikë, për ta ftuar setin e parë thellë, teksa volejbollistja nga Maqedonia e Veriut, Ana Fasuleva, fiksoi shifrat finale 25-12. Barleti provon të reagojë në setin e dytë dhe e fillon mirë, por gradualisht loja e kryeqytetaseve zbehet, ndërsa vendëset fitojnë 25-17.
Me të njëjtën rezultat përfundon edhe seti i tretë, i kontrolluar pa probleme nga Pogradeci, që i mbyll kështu llogaritë e takimin në harkun kohor të 74 minutave. Bruna Aoki me 15 pikë, Ana Fasuleve me 13 si dhe Edona Kalludra me 10 spikatën ofensivën pogradecare.
Me këtë fitore liqenoret ngjiten nga vendi i parafundit në vendin e katërt të renditjes. Ndërkohë, duke kaluar në kampion universitar, asnjë lojtare e Barletit nuk preku dopioshifër pikësh, ku shënuesja më e mirë ishte Keisi Shira me 9 pikë. Kjo ishte humbja e shtatë radhazi për vajzat që drejtohen nga Altin Gorenca, të cilat janë abonuar me fundin e tabelës dhe duket se “notojnë” të sigurta drejt rënies nga kategoria.
Kujtojmë që në ndeshjet e tjera të kësaj jave, të enjten Skënderbeu kryesues fitoi 1- 3 në Shkodër kundër Vllaznisë, ndërsa të shtunën Tirana mundi 0-3 Teutën në Durrës dhe Partizani mposhti gjithashtu me rezultat të pastër Dinamon në derbi.
