Bashkia e Maliqit ka nisur punimet për rikonstruksionin dhe asfaltimin e 11 rrugëve rurale në njësitë e saj administrative, një investim i rëndësishëm që po realizohet tërësisht me të ardhurat e vetë bashkisë. Aktualisht, ndërhyrjet po zhvillohen në fshatrat Symiz dhe Kolanec.
Sipas kryetarit të Bashkisë Maliq, Gëzim Topçiu, këto ndërhyrje synojnë përmirësimin e infrastrukturës rrugore dhe lehtësimin e jetës së banorëve në zonat rurale. Ai shtoi se nëse arrihen kursime nga prokurimet publike, gjatë vitit 2025 pritet që listës së 11 rrugëve t’u shtohen edhe 4 të tjera.
Banorët e fshatit Symiz janë shprehur të kënaqur me punimet që po kryhen në rrugën kryesore të fshatit, duke theksuar se pas shumë vitesh po i japin fund problemeve të përditshme me baltën dhe pluhurin.
Ky nuk është investimi i parë i këtij lloji. Edhe gjatë vitit 2024, Bashkia e Maliqit ka realizuar punime në 11 rrugë të tjera rurale, të cilat tashmë janë përfunduar me sukses.
Përmes këtij angazhimi të vazhdueshëm, Bashkia e Maliqit tregon përkushtim për përmirësimin e jetës në fshat dhe zhvillimin e qëndrueshëm të infrastrukturës në të gjithë territorin e saj.
