Në një atmosferë emocionuese dhe festive, maturantët e Gjimnazit “Themistokli Gërmenji” në Korçë kanë mbyllur një kapitull të rëndësishëm të jetës së tyre, duke nënshkruar simbolikisht faqen e fundit të librit që kanë shkruar së bashku gjatë tre viteve të gjimnazit.
Secili prej tyre ka kontribuar në këtë “libër” me individualitetin, pasionin dhe përkushtimin e vet, duke ndërthurur durimin, këmbënguljen dhe vullnetin për dijen me energjinë rinore. Kjo ka krijuar një histori unike, që mbetet pjesë e kujtimeve të paharrueshme për këtë gjeneratë.
Të pajisur tashmë me dije dhe përvoja të vyera, maturantët janë gati të nisin sfida të reja në fusha të ndryshme si shkenca natyrore, matematika, letërsia, arti dhe sporti. Ata kanë qenë gjithashtu ambasadorë të shkëlqyer të shkollës dhe të qytetit, duke sjellë trofe dhe çmime në gara e aktivitete të ndryshme.
Në këtë ceremoni të veçantë, maturantët e vitit 2025 u përshëndetën me fjalë të ngrohta nga Drejtoresha e DRAP Korçë, znj. Vinjola Rota, si dhe nga prindër, familjarë dhe mësues, të cilët ndanë me ta emocione dhe urime për të ardhmen.
