Verërat shqiptare dhe veçanërisht ato të Leskovikut u vunë në fokus në episodin më të fundit të podcastit “FLASIM”, ku i ftuar ishte përfaqësuesi i Max Mavrud, Erald Fejzulla. Në një bisedë të gjatë dhe të sinqertë, Fejzulla ndau historinë, pasionin dhe ambicien e tij për ringritjen e traditës së verës në zonat malore të vendit.
Gjatë podcastit me Kryeministrin Edi Rama, ai theksoi rëndësinë e mbështetjes shtetërore për zonat malore.
“Sot pata mundësinë të jem pjesë e një bisede të gjatë dhe të sinqertë me Kryeministrin Rama për malet e Shqipërisë dhe për vëmendjen që qeveria po i jep këtyre zonave që, për dekada me radhë, kanë pritur ringjallje,” u shpreh Fejzulla.
Ai theksoi se pjesëmarrja në podcast nuk kishte qëllim promovimi personal, por dëshirën për të treguar një histori suksesi që ka lindur në kushte të vështira.
“Unë zgjodha të jem pjesë e këtij podcasti për një arsye shumë të thjeshtë: sepse besoj thellë se ajo që kemi bërë ne në Leskovik është një histori që duhet ndarë. Jo për t’u mburrur, por për të treguar se çfarë ndodh kur përkushtimi, pasioni dhe puna përplasen me një tokë të egër, të bukur dhe shpesh të nënvlerësuar.”
Fejzulla foli edhe për vizionin e tij afatgjatë, i cili shkon përtej prodhimit të verës.
“Në podcast shpalosa vizionin tim për verën e Leskovikut, një vizion që nuk ka të bëjë vetëm me shishe vere, por me identitet, me histori, me krenari lokale,” tha ai, duke shtuar se synon rikthimin e lavdisë që Leskoviku ka pasur dikur.
Në takimin me Kryeministrin, ai bëri një kërkesë të qartë:
“Kryeministrit i kërkova një gjë shumë të qartë: që vëmendja për zonat malore, sidomos për Leskovikun, të mos bjerë asnjëherë. Sepse malet nuk ngrihen me fjalë, por me rrugë më të mira, me infrastrukturë, me investime në turizëm, me mbështetje për bujqësinë dhe blegtorinë.”
Erald Fejzulla u shpreh se do të vijojë të jetë këmbëngulës në misionin e tij për ta ngritur Leskovikun aty ku e meriton.
“E di çfarë vlen Leskoviku. E di çfarë mund të bëjë kjo tokë kur i jepet mundësia. Dhe dua që çdo shqiptar ta shohë këtë histori si frymëzim se edhe një kodër e egër mund të kthehet në pasuri kombëtare, mjafton dashuria, puna dhe pak besim në të ardhmen.”
Një bisedë që ngre lart verën shqiptare dhe e kthen vëmendjen te potenciali i madh i zonave malore të vendit.
