Këtë të premte, në orën 18:00, në zemër të rajonit të Prespës, zhvillohet festivali ndërkufitar “MEET” Prespa, një ngjarje kulturore që synon të bashkojë traditat, historitë dhe komunitetet e Shqipërisë dhe Maqedonisë së Veriut.
I organizuar në bashkëpunim me Bashkinë Pustec, Bashkinë Devoll, Bashkinë Kolonjë, Bashkinë Pogradec dhe Komunën e Resnjes, ky festival përfaqëson një platformë unike ndërkufitare ku muzika, vallet tradicionale, ekspozitat dhe gatimet autoktone bëhen ura lidhëse mes dy shteteve.
Programi i festivalit do të sjellë në skenë grupe folklorike, performanca artistike dhe aktivitete që pasqyrojnë pasurinë kulturore të zonës së Prespës – një rajon me identitet të përbashkët dhe me histori të ndërthurura.
“MEET” Prespa është më shumë se një festë artistike – është një mesazh bashkëjetese, respekti dhe bashkëpunimi ndërmjet komuniteteve përtej kufijve shtetërorë. Pusteci do të presë vizitorë nga të dy anët e liqenit me mikpritjen karakteristike të zonës, për të ndarë një mbrëmje që i përket gjithë Ballkanit.
