Korça është një qytet që e ka trashëguar brez pas brezi pasionin për artin, kulturën dhe koleksionimin e objekteve me vlerë. Një nga ata që e ka kthyer këtë pasion në një mision personal është Mirgen Shamblli, koleksionisti korçar që herë pas here sjell për publikun ekspozita të veçanta, duke i dhënë jetë kujtesës së qytetit përmes objekteve të rralla.
Prej vitesh, Shamblli ka grumbulluar me kujdes dhe përkushtim dhjetëra objekte të vjetra – që nga monedhat e rralla, dokumentet historike, prodhime qelqi e qeramike e shumë të tjera – të cilat në duart e tij kthehen në dëshmi të gjalla të historisë dhe kulturës qytetare. Ekspozitat e hapura së fundmi në “Qoshkën e Koleksionistëve” në Pazarin e Vjetër të Korçës janë kthyer në një pikëtakim mes nostalgjisë dhe kulturës, duke tërhequr vizitorë vendas e të huaj.
Së fundmi, ai ka çelur një ekspozitë të pazakontë me ora tavoline të viteve 1930–1980, të cilat i ka mbledhur ndër vite. Koleksioni përbëhet nga rreth 70 ora të markave të ndryshme, prodhim vendas dhe të huaja, të mbledhura gjatë një periudhe mbi 20-vjeçare. Të ekspozuara për herë të parë, këto objekte sjellin një copëz nga jeta e përditshme e qytetarëve të dikurshëm, kur zilet e alarmit kumbonin në mëhallat e Korçës duke paralajmëruar fillimin e ditës.
“Çdo orë ka historinë e vet. Përmes tyre shfaqet edhe mënyra se si njerëzit e kanë përjetuar kohën, me dizajne e teknologji që ndryshojnë sipas viteve. Ajo që për dikë është thjesht një objekt i vjetër, për mua është një dëshmi e gjallë e historisë së qytetit,” – rrëfen Shamblli.
Me këtë pasion, Mirgen Shamblli jo vetëm ruan trashëgiminë materiale, por krijon edhe ura komunikimi mes brezave, duke treguar se kujtesa nuk është thjesht në libra apo arkiva, por shpesh gjendet edhe në objektet më të thjeshta të përditshmërisë. Ekspozita e orëve është vetëm një tjetër dëshmi e këtij përkushtimi, që e bën atë një nga koleksionistët më të spikatur të Korçës.
