Amanda Pushani është raportuar e vdekur nga familjarët e saj të shtunën rreth orës 11:40, në Tiranë.
Pas hetimeve rezultoi se vdekja nuk kishte ardhur për shkaqe natyrale. Nga autopsia ka rezultuar se 37-vjeçarja ka ndërruar jetë për shkak të plagëve nga një mjet prerës.
Në vijim të veprimeve, specialistët e Sektorit për Hetimin e Krimeve të Rënda arrestuan 40-vjeçaren Marsela Pushani, motrën e viktimës e cila dyshohet se e ka plagosur për vdekje pas një konflikti.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.
Viktima sipas dëshmive vuante nga problemet me alkolin dhe ditën e ngjarjes kishte konsumuar pije. Motra dhe nëna e saj kanë deklaruar se ajo në gjendje të dehur shkonte te dyqanet e lagjes dhe kërcënonte shitësit për t’i dhënë pije pasi përndryshe do t’i thyente marketin.
Marsela Pushani ka deklaruar se Armanda erdhi e dehur në shtëpi pasi kishte qëndruar jashtë natën e së premtes dhe kishte me vete edhe disa shishe birre, në ketë moment në banesë ka nisur konflikti pasi ajo dhe nëna i kanë kërkuar llogari pse vijonte të pinte, pasi kishin rënë dakord që do hiqte dore.
Mësuesja Marsela ka deklaruar, thikën e mori e motra Armanda dhe teksa tentoi t’ja hiqte nga duart duke u përleshur ajo u plagos duke ndërruar dhe jetë.
Më pas kanë lajmëruar ambulancën duke i treguar se kishte vdekur në mënyrë natyrale, por hetimet e Komisariatit nr. 3 dhe raporti i autopsisë zbuloi planin për të fshehur ngjarjen.
