Muzeu Kombëtar i Artit Mesjetar në Korçë vazhdon të tërheqë vëmendjen e vizitorëve të huaj, duke u kthyer në një ndër destinacionet më të frekuentuara të qytetit. Së fundmi, ai është vizituar nga një grup turistësh gjermanë, të cilët u shprehën të mahnitur nga pasuria artistike dhe mënyra e ekspozimit të ikonave në këtë muze unik.
Disa prej turistëve ndodheshin për herë të parë në Korçë dhe kishin marrë informacion paraprak mbi vendet që duhej të vizitonin, ku natyrshëm Muzeu Kombëtar i Artit Mesjetar zinte një vend të rëndësishëm.
Një vlerë e shtuar për vizitorët janë edhe guidat audio të disponueshme në gjuhet angleze, frënge, ukrainase dhe shqipe, ndërsa aktualisht është në përpunim edhe një version në gjuhën spanjolle, duke lehtësuar më tej orientimin dhe përthithjen e informacionit nga vizitorë të huaj.
Muzeu ka një fond të pasur prej mbi 8000 objektesh, nga të cilat rreth 6500 janë ikona me vlera të veçanta historike dhe kulturore, që pasqyrojnë trashëgiminë artistike bizantine dhe postbizantine në Shqipëri.
