Agjencia Rajonale e Ekstensionit Bujqësor ka shpërndarë 7580 karta të naftës pa akcizë në të gjithë qarkun e Korçës. Ky proces është duke vijuar prej mesit të muajit prill menjëherë pas përfundimit të aplikimeve për këtë skemë mbështetëse të ofruar nga qeveria shqiptare.
Sipas burimeve zyrtare nga Agjencia Rajonale e Ekstensionit Bujqësor në Korçë në të gjithë qarkun e Korçës janë kryer 10 965 aplikime për skemës e naftës pa akcizë, ndërsa tashmë është duke vijuar hap pas hapi edhe shpërndarja e kartave të naftës për fermerët.
Interesi për këtë skemë është gjithnjë e më i lartë pasi ka rezultuar një ndër skemat më të suksesshme të mbështetjes të aplikuara nga qeveria shqiptare.
Skema e mbështetjes me naftë ndihmon drejtpërdrejt fermerët dhe makineritë e tyre bujqësore, prodhimin vendas, punimin e tokës, kultivimin e bimëve në serra, si dhe frutorët. Qëllimi i kësaj mase është ulja e kostove për fermerët dhe rritja e rendimentit të prodhimit.
Sipas Agjencisë së Zhvillimit Bujqësor e Rural, interesi i fermerëve për të përfituar nga Skema Kombëtare është tejet i lartë dhe kjo falë mbështetjes financiare për këtë sektor, që ka qenë çdo vit në dispozicion të tyre. Skema e mbështetjes për naftë falas, vijon për të tretin vit radhazi me një buxhet prej 1.4 miliardë lekë për të gjithë vendin. Kjo skemë është pjesë e skemës kombëtare të mbështetjes në bujqësi.
Fondi total i Skemës Kombëtare të mbështetjes në bujqësi që do të shpërndahet gjatë këtij viti është 3.3 miliardë lekë dhe do të financohen në total 9 masa.
