Pavarësisht temperaturave të larta që kaloi vendi gjatë muajit korrik, duket se administratorët e hoteleve dhe bujtinave në Korçë po ngrohen më shumë gjatë muajit gusht.
Kjo për faktin se gjatë këtij muaji Korça po shënon bumin sa i takon fluksit të vizitorëve. Alba Asabella e cila menaxhon një bujtinë në qytet thotë se krahasuar me 1 vit më parë korriku ka shënuar prenotime më të larta, por gushti është paraqitet totalisht i rezervuar. Ajo thotë se numri më i lartë gjatë korrik ka qenë nga të huajt ndërsa gushti sjell shqiptarë.
Edhe Enriketa Koçibelli pranon se korriku ka qenë i vakët dhe se gusht e në vazhdimësi ka nisur rritja e prenotimeve. Edhe autoritetet lokale e pranojnë se gushti në Korçë, ndoshta edhe për shkak të temperaturave më të freskëta dhe eventeve të përvitshme që organizohen shënon numër më të lartë turistësh.
Benila Themeli nën kryetare në Bashkinë Korçë shprehet se ndonëse jemi ende në gusht në Korçë kanë nisur prenotimet për stinën e dimrit dhe festat e fundvitit, që shënojnë kulmin e prenotimeve dhe vizitorëve në qytetin juglindor.
Paralelisht bashkia Korçë po përgatit një paketë turistike për të gjithë zonën e juglindjes si dhe shkëmbimin e vizitorëve me qytetet kufitare të Greqisë dhe Maqedonisë së Veriut.
