Në kuadër të 58-vjetorit të ndarjes nga jeta të një prej figurave më të rëndësishme të letërsisë shqipe, Mitrush Kutelit, u organizua aktiviteti përkujtimor “Në kujtim të Mitrushit”, një iniciativë që solli së bashku artin, kujtesën dhe teknologjinë. Aktiviteti u zhvillua në bashkëpunim mes COD (Qendra për Hapje dhe Dialog), shkollës 9-vjeçare “Sevasti Qiriazi” në Korçë dhe Galerisë së Arteve Digjitale Korçë.
Nxënësit e shkollës sollën interpretime artistike nga krijimtaria e Kutelit, duke lexuar me emocion pjesë nga poezitë dhe prozat e tij, dhe duke i rikthyer në skenë zërin e një prej mjeshtrave të letrave shqipe.
Pjesë e veçantë e aktivitetit ishte përfshirja e teknologjisë, ku fëmijët përdorën inteligjencën artificiale për të krijuar mini-klipe artistike të frymëzuara nga vepra e autorit. Këto krijime ndërthurën me finesë elementët tradicionalë me ato bashkëkohorë, duke sjellë një formë inovative të nderimit dhe përjetësimit të trashëgimisë kulturore.
“Në kujtim të Mitrushit” u kthye kështu në një homazh të denjë për Mitrush Kutelin – një shkrimtar që nuk i përket vetëm së kaluarës, por që frymëzon edhe të ardhmen, në format më bashkëkohore të shprehjes artistike.
