Drejtoria Vendore e Policisë Korçë ka vijuar veprimtarinë procedurale për një sërë ngjarjesh të ndodhura në ditët e fundit në qytetet e qarkut, duke referuar materiale në Prokurori për vepra të ndryshme penale.
Arrestim për drejtim mjeti në gjendje të dehur:
Specialistët e Qarkullimit Rrugor arrestuan në flagrancë shtetasin Gj. K., 41 vjeç, banues në Korçë, pasi u kap duke drejtuar një motomjet në gjendje të dehur.
Kanosje dhe mosbindje ndaj Policisë në Devoll:
Janë referuar materialet për shtetasit Th. M., 60 vjeç dhe E. M., 24 vjeç, banues në Ponçarë, të cilët dyshohet se kanë kanosur dy persona. Gjatë shoqërimit, i riu 24-vjeçar nuk i është bindur urdhrave të Policisë.
Konflikt për motive të dobëta në Kolonjë:
Dy shtetase, L. C., 46 vjeçe, dhe L. Sh., 61 vjeçe, banuese në Starje, janë proceduar penalisht pasi janë konfliktuar fizikisht me njëra-tjetrën.
Zjarri nga pakujdesia në Pogradec:
Shtetasi T. A., 32 vjeç, nga Hudënishti, po procedohet penalisht pasi dyshohet se, nga pakujdesia, ka shkaktuar një zjarr që dogji sipërfaqe me bimësi.
Vjedhje në një banesë në Korçë:
Shtetasi Sh. D., 53 vjeç, ka kallëzuar në Polici se, gjatë mungesës së tij në banesë, i janë vjedhur pajisje elektronike dhe bizhuteri. Policia ka nisur hetimet për identifikimin e autorëve.
Rast kontrabande në Vidohovë:
Shtetasi N. M., 67 vjeç, është proceduar për “Kontrabandë me mallra të tjera”, pasi u kap duke kaluar në mënyrë të paligjshme dy kafshë në territorin e Greqisë.
Të gjitha materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme ligjore.
