Bashkia e Maliqit ka nisur punimet për rehabilitimin e disa pallateve problematikë në qytet, duke u fokusuar në përmirësimin e kushteve të banimit dhe transformimin estetik të hapësirave të përbashkëta.
Punimet përfshijnë ndërrimin e çative, veshjen termoizoluese (kapot), si dhe sistemimin e hapësirave të jashtme përreth pallateve. Këto ndërhyrje synojnë të krijojnë një mjedis më të qëndrueshëm dhe më të përshtatshëm për jetesë, duke kontribuar edhe në efikasitetin energjetik të ndërtesave.
Banorët e pallateve të rehabilituar janë inkurajuar të bashkëpunojnë me njëri-tjetrin për të ruajtur investimin dhe për të siguruar jetëgjatësinë e tij. Investimi është pjesë e angazhimit të Bashkisë Maliq për përmirësimin e infrastrukturës urbane dhe cilësisë së jetës në komunitet.
