Në qytetin e Korçës kanë nisur zyrtarisht punimet për rikonstruksionin e Pallatit të Sportit “Tamara Nikolla”, një investim i rëndësishëm që do të sjellë një transformim të plotë të kësaj hapësire sportive, simbol i traditës së Klubit Shumësportësh “Skënderbeu”.
Në njoftimin zyrtar të klubit thuhet se qëllimi i projektit është kthimi i pallatit të sportit në një ambient modern dhe funksional, që do të plotësojë të gjitha standardet bashkëkohore për zhvillimin e aktiviteteve të disiplinave të ndryshme sportive që përfaqësojnë klubin.
Gjatë periudhës së punimeve, ambientet e pallatit do të qëndrojnë të mbyllura për publikun, ndërsa aktivitetet dhe stërvitjet e sportistëve do të zhvendosen përkohësisht në hapësira alternative, për të mos ndërprerë procesin e përgatitjeve.
Klubi Shumësportësh “Skënderbeu” falënderon sportistët, trajnerët dhe tifozët për mirëkuptimin dhe mbështetjen e tyre të vazhdueshme, duke theksuar se shumë shpejt Korça do të ketë një pallat sporti model, në përputhje me historinë dhe emrin e madh të klubit.
Ky investim pritet të japë një frymë të re për sportin korçar, duke krijuar kushte optimale për zhvillimin e talenteve të reja dhe për organizimin e aktiviteteve sportive me standarde më të larta.
