Trupi i pajetë i minatorit 40-vjeçar, Ilir Kolaveri, është nxjerrë nga miniera e Tërnovës në Bulqizë pas më shumë se 24 orësh kërkime intensive, pas një aksidenti fatal në galeritë e subjektit “Eternal Security”.
Sipas informacioneve paraprake, dyshohet se 40-vjeçari ka rënë në një furnel brenda galerisë dhe më pas është mbuluar nga një masiv gurësh. Operacioni për gjetjen dhe nxjerrjen e trupit ka zgjatur për më shumë se 24 orë për shkak të vështirësive të terrenit nëntokësor pas shembjes.
Ekspertiza mjeko-ligjore dhe hetimet për aksidentin
Pas përfundimit të operacionit të kërkim-shpëtimit dhe nxjerrjes nga galeria, trupi i pajetë i minatorit është transportuar drejt Tiranës. Aty ai do t’i nënshtrohet ekspertizës mjeko-ligjore, e cila pritet të shërbejë për përcaktimin e plotë të shkaqeve të vdekjes.
Ndërkohë, grupi hetimor i ngritur për këtë ngjarje vijon punën në terren. Autoritetet po mbledhin provat e nevojshme për zbardhjen e plotë të rrethanave dhe shkaqeve që çuan në këtë aksident tragjik në minierën e Bulqizës.
Foto ilustruese.
