Drejtoria Vendore e Policisë Korçë ka finalizuar me sukses operacionin policor të koduar “Liboniku”, i cili erdhi pas një muaji hetimesh intensive me metoda proaktive, për goditjen e veprimtarisë kriminale në fushën e narkotikëve.
Në kuadër të këtij operacioni, u bë i mundur identifikimi dhe arrestimi në flagrancë i shtetasit J. B., 39 vjeç, banues në Libonik, Maliq, i cili dyshohet se shpërndante doza kokaine dhe cannabisi në qytetin e Maliqit dhe në fshatrat përreth. Gjatë kontrollit të ushtruar në automjetin dhe banesën e tij, policia sekuestroi sasi të ndara të kokainës gati për shitje, një sasi cannabisi, një peshore elektronike, municion luftarak si dhe një automjet.
Shtetasi J. B. u arrestua për veprat penale “Prodhimi dhe shitja e narkotikëve” dhe “Mbajtja pa leje dhe prodhimi i armëve, armëve shpërthyese dhe municionit”. Hetimet vijojnë në bashkëpunim me Prokurorinë për identifikimin dhe ndalimin e personave të tjerë të përfshirë në këtë aktivitet të paligjshëm.
Materialet procedurale janë referuar në Prokurorinë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
