Krahina e Kolonjës është e njohur për prodhime te shumta tradicionale, kryesisht të zejtarise por dhe ato agroperpunuese. Amvisat kolonjare janë po kaq të njohura dhe për kulinarinë, përfshi këtu dhe zahiretë e dimrit.
Për të ruajtur këtë traditë bashkia e Kolonjës çdo vit organizon panaire të shumta. Kjo është Meqele Isa nga Erseka, e cila në këtë panair është përfaqësuar me zahiretë e dimrit, prodhime të cilat fillimisht i ka përgatitur për familjen e vet por duke qenë se pëlqehen shumë nga turistët e huaj, ajo tashmë e ka kthyer në aktivitet tregtar.
“Gratë kolonjare janë të dëgjuar për gatesën e këtyre trahanve, ushqimeve tradicionale. Kam nxjerr trahana me ngjyrë të kuqe, trahana të bardhë, rosnica, petë, komposto thane, turshira me speca, reçel, raki Mani, ruashi, kumbulle, petulla, ëmbëlsira, nga të gjitha”
“Në panair kemi nxjerr komposto qershie, kumbulle, fiku, gogozhdare, Mani, thane. Gruaja I ka gatuar dhe i shet burri”
Kolonja është e njohur edhe për punimet e dorës, aq të kërkuara nga turistët vendas e me tepër të huaj.
“Unë në këtë panair kam nxjerrë punedore, që kam nisur ti bej qe ne moshën 5 vjeçare. Kam ndjerë punedore të ndryshme të punuara me grep, qëndisje kryqke, punedore me shtija që jo vetëm i reklamojme por që duam tua lëmë trashëgimi vajzave dhe nuseve”
Në një panair si ky që ndodh në ditën e trashëgimisë kulturore nuk kishte si të mungonin sazet e Kolonjës. Instrumentisti virtuoz Aleks Xhelili thotë se për të ruajtur traditën e muzikës kolonjare e sazeve të kësaj treve, pjesë e instrumentave të frymes dhe jo vetëm jenë bërë e të rinjtë kolonjare.
“Organizojmë një koncert me qellim që t’i ruajmë ato vlera që ka ky popull që jeton këtu. Në këtë koncert marrin pjesë këngëtarët mbartës të folklorit, fanatikë e njëkohësisht e veçanta e këtij koncerti është se marrin pjesë të rinj debutues që e duan muzikën popullore”
Kolonja nga njëri në vit në tjetrin vizitohet shumë nga turistë të huaj. Vetëm këtë vit krahinen e kanë vizituar me shume se 25.000 turistë nga vende të ndryshme të botës. Për të tërhequr sa më shumë turistë, sipas kryetarit të bashkisë panaire të kësaj natyre do të jenë të vazhdueshme edhe sepse tërheqin vëmendjen e vizitorëve.
“Kolonja është tipari dallues me i madhi në Shqipëri, me emocional, më me ngjyra më me taban i trashëgimisë kulturore.
Besoj na takonte si çdo vit që këtë aktivitet ti jepnim këtë ngjyrë, këtë moment. E nisim me fëmijët si me tipar për të treguar vizionin për të trashëguar, me një panair që zhvillon zonën dhe një darkë e këndshme me muzikën tradicionale të Kolonjës“- është shprehur kryebashkiaku Erion Isai.
Në qytetin e Ersekës dhe fshatrat turistikë të njohur të zonës ka më shumë se 40 hotele, bujtina dhe shtëpi pritëse me më tepër se 600 vende akomodimi.
