Vijojnë investimet për përmirësimin e infrastrukturës bujqësore në bashkinë e Korçës, ku po kryhen punime për pastrimin e shtratit të lumit dhe rehabilitimin e argjinaturës në zonën e Dunavecit. Ky projekt synon të përmirësojë kullimin dhe të mbrojë rreth 3,620 hektarë tokë bujqësore, duke ndihmuar në rritjen e rendimentit dhe ruajtjen e cilësisë së prodhimeve bujqësore.
Pamjet nga terreni u shpërndanë sot edhe nga Kryeministri Edi Rama, i cili theksoi se investime të tilla janë jetike për përparimin e sektorit bujqësor dhe rritjen e konkurrueshmërisë së produkteve “Made in Albania”. Sipas tij, përmirësimi i kushteve për fermerët është një hap konkret drejt zhvillimit të qëndrueshëm rural.
Ndërkohë, Ministria e Bujqësisë dhe Zhvillimit Rural, përmes bordeve të Ujitjes dhe Kullimit, vijon punën për sistemimin e kanaleve dytësore në të gjithë zonat rurale, për të lehtësuar aksesin në ujë për vaditje dhe për të mbështetur fermerët në rritjen e produktivitetit të tokave.
