Në fshatin Dërsnik të njësisë administrative Voskop, kryetari i Bashkisë Korçë Sotiraq Filo, ka inspektuar punimet përfundimtare në rrugën Polenë–Dërsnik, një nga projektet më të rëndësishme infrastrukturore të këtij viti.
Segmenti prej 4.6 kilometrash është riveshur plotësisht me asfalt, duke përmbushur një nga kërkesat më të hershme të banorëve dhe duke lehtësuar ndjeshëm qarkullimin, si për banorët ashtu edhe për transportin e prodhimeve bujqësore drejt tregjeve.
Ky investim, i realizuar në bashkëpunim me Fondin Shqiptar të Zhvillimit, është pjesë e strategjisë së Bashkisë Korçë për përmirësimin e infrastrukturës rurale dhe për nxitjen e zhvillimit ekonomik në zonat bujqësore.
Autoritetet lokale kanë theksuar se ky projekt është dëshmi e angazhimit konkret për të përmirësuar cilësinë e jetës në fshat dhe për të mbështetur prodhuesit vendas në përpjekjet e tyre për një bujqësi më efikase dhe të qëndrueshme.
