Presidenti i Serbisë, Aleksandar Vuçiç, ka lëshuar akuza të ashpra ndaj Komisionit Evropian, duke deklaruar se reagimi i tyre i shpejtë kundër idesë së tij për ndryshimin e rrjedhës së lumit Ibër bëhet për të mbrojtur ata që ai i quajti “shërbëtorët e tyre shqiptarë”. Ky reagim vjen pas deklaratave të zëdhënëses së KE-së, e cila theksoi se plane të tilla nuk ndihmojnë në normalizimin e marrëdhënieve.
Sipas mediave serbe, kreu i shtetit serb theksoi se reagimet nga ana e institucioneve evropiane kanë munguar plotësisht kur bëhet fjalë për dështimin e formimit të Bashkësisë së Komunave Serbe në Kosovë, si dhe ndaj atyre që ai i cilëson si arrestime dhe keqtrajtime të përditshme të komunitetit serb.
Gjatë një prononcimi në qytetin e Ariljes, duke iu përgjigjur pyetjes së një gazetareje lidhur me qëndrimin e zëdhënëses së Komisionit Evropian, Anita Hipper, e cila tha se zgjidhjet arrihen vetëm përmes dialogut, Vuçiç vuri në dyshim vetë procesin e ndërmjetësuar nga Brukseli. “A e keni fjalën për dialogun që nënshkruat edhe për formimin e Bashkësisë së Komunave Serbe, a e keni fjalën për atë dialog? Apo e keni fjalën për mungesën e dialogut dhe reagimet tuaja ndaj arrestimeve të përditshme të serbëve, keqtrajtimit të përditshëm të serbëve, persekutimit të përditshëm të serbëve, prishjes së shtëpive serbe, a e keni fjalën për këtë? Dhe pastaj ju kujtuat nëse dikush do t’i ndryshonte apo jo rrjedhën e ujit”, u shpreh ai.
Plani për lumin Ibër dhe biseda e tensionuar me KFOR
Lidhur me idenë e devijimit të lumit Ibër, presidenti serb sqaroi se ky është një proces ende i largët që kërkon ngritjen e një grupi pune dhe angazhimin e ekspertëve. “Ne tashmë kemi disa ekspertë, na duhen edhe të tjerë, kështu që le të shohim se çfarë do të bëjmë dhe si do ta bëjmë. Por ata reaguan menjëherë ndaj kësaj, për të mbrojtur ‘shërbëtorët e tyre shqiptarë’ dhe për t’u thënë edhe një herë: vazhdoni të kryeni krime”, theksoi Vuçiç.
Një tjetër pikë e fortë e deklaratës së tij ishte zbulimi i një bisede mes shefit të Shtabit të Përgjithshëm të ushtrisë serbe, Milan Mojsiloviç, dhe komandantit të KFOR-it, Özkan Ulutaş. Sipas Vuçiç, komandanti turk i KFOR-it i ka thënë palës serbe se “Pa problem, Policia e Kosovës do të punojë me ne…”. Kjo përgjigje ka ngjallur reagimin e ashpër të presidentit serb, i cili e lidhi situatën me ngjarjet e vitit 1999, duke thënë se tashmë e kuptojnë pse ndërkombëtarët vepruan në atë mënyrë. Kur u pyet nga gazetarët për këtë komunikim, Vuçiç e cilësoi atë si “ndoshta biseda më e keqe midis gjeneral Mojsiloviçit dhe komandantit të KFOR-it deri më tani”.
Akuzat për Marrëveshjen e Brukselit
Në përfundim të fjalës së tij, Vuçiç akuzoi palën shqiptare për mosrespektim të detyrimeve ndërkombëtare, veçanërisht Marrëveshjes së Brukselit. Ai pretendoi se Serbia ka bërë gjithçka për të përmbushur pjesën e saj, ndërsa pala tjetër nuk ka pasur kurrë ndërmend ta bëjë këtë. “Dhe gjithçka u bë që ne ta përmbushnim, në mënyrë që ata të përmbushnin atë detyrim të vetëm. Dhe ata nuk e përmbushën atë dhe kurrë nuk u shkoi ndër mend ta përmbushnin. Dhe ata thonë se nuk u shkoi ndër mend kurrë. Dhe ju u jepni gjithçka tjetër vetëm sepse doni ta dëboni Serbinë nga Kosova. Dhe ju ende na kërkoni t’ju kërkojmë falje dhe t’ju themi sa të sjellshëm jeni, por ne jemi ‘të këqij’ dhe nuk dimë çfarë po bëjmë”, përfundoi presidenti serb, duke shtuar se nuk pranon leksione nga ata që nuk respektojnë kontratat e nënshkruara.
