Në ambientet e Fakultetit të Edukimit dhe Filologjisë në Universitetin “Fan S. Noli”, u zhvillua ceremonia e përurimit të librit “Porosia e kullës”, me autor dr. Pashko R. Camaj. Aktiviteti u organizua në bashkëpunim me Shtëpinë Botuese “Onufri” dhe mblodhi pedagogë, studentë, shkrimtarë, poetë dhe dashamirës të letërsisë.
Takimin e hapi përgjegjësi i Departamentit të Gjuhës dhe Letërsisë, prof. as. dr. Eris Rusi, i cili prezantoi autorin si një personalitet të shquar jo vetëm në fushën letrare, por edhe si sekretar i Federatës Panshqiptare “Vatra” në New York, SHBA.
Në fjalën e saj, dekania e Fakultetit të Edukimit dhe Filologjisë, prof. as. dr. Jonela Spaho, theksoi rëndësinë e librit në ruajtjen e trashëgimisë kulturore shqiptare në diasporë. Ajo e cilësoi veprën si një rrëfim emocionues mbi ëndrrën amerikane, mallin dhe dashurinë për atdheun.
Drejtuesi i Shtëpisë Botuese “Onufri”, z. Bujar Hudhri, ndau përvojat e punës me autorin, duke e vlerësuar për talentin dhe modestinë që e karakterizon. Po ashtu, pedagogu dr. Ilir Shyta foli mbi përmbajtjen e librit, duke veçuar tregimet e vërteta të jetës së autorit dhe familjes së tij nga fëmijëria e deri më sot.
Autori, dr. Pashko R. Camaj, shprehu mirënjohjen për organizimin, ndërsa gjatë takimit u nderua me dy vlerësime të veçanta: nga Klubi i Shkrimtarëve “Bota e Re”, Korçë dhe nga Fakulteti i Edukimit dhe Filologjisë, që i dorëzoi Certifikatën e Vlerësimit me motivacionin: “Në vlerësim të kontributit të tij të vyer profesional dhe angazhimit të plodhur publik, që kanë ndihmuar në rritjen e vlerave të komunitetit shqiptar në SHBA.”
Takimi u pasua nga diskutime të pjesëmarrësve mbi veprën dhe temat që ajo trajton, duke sjellë edhe rrëfime personale mbi jetën larg atdheut.
Në përfundim, dr. Pashko R. Camaj dhe z. Bujar Hudhri zhvilluan një takim me rektorin e Universitetit “Fan S. Noli”, prof. dr. Lorenc Ekonomi, ku u diskutuan mundësitë për bashkëpunime të tjera kulturore e letrare në të ardhmen.
